ဗိုလ်ဗထူးအိမ်ရာ လျှောက်လွှာများ မေလ ၁၄၊ ၁၅ ရက် မဲနှိုက်မည်

Date: 12/05/2014

 ဒဂုံမြို့သစ်မြောက်ပိုင်း မှ ဗိုလ်ဗထူး တန်ဖိုးမျှတအိမ်ရာ ၀ယ်ယူရန် လျှောက်လွှာတင်ထား သူများကို မေလ ၁၄၊ ၁၅ ရက်တို့ တွင် မဲနှိုက်မည်ဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့မှ သတင်းရရှိသည်။
ရန်ကုန်မြို့တော် စည်ပင် သာယာရေး ကော်မတီမှ တာဝန် ယူတည်ဆောက်သည့် အဆိုပါ အိမ်ရာစီမံကိန်းတွင် လျှောက်ထားသည့် လျှောက်လွှာ ၄၀၀ ကျော်ရှိပြီး ယင်းတို့ကို ဦးစားပေး မဲဖောက်မည်ဖြစ်ကာ သင်္ကြန်မတိုင်မီက မဲဖောက်ခဲ့သည့် ဗိုလ်မင်းရောင် အိမ်ရာစီမံကိန်းတွင် မဲမပေါက်ခဲ့သူများကိုလည်း ပြန်လည်ထည့်သွင်း မဲဖောက်ပေးရန် စီစဉ်လျက်ရှိကြောင်း သိရသည်။
ကျပ်သိန်း ၂၀၀ မှ သိန်း ၃၀၀ ကျော်အထိ တန်ဖိုးရှိသည့် ဒဂုံမြို့သစ်မြောက်ပိုင်းမှ အိမ်ရာ စီမံကိန်းနှစ်ခုစလုံးပေါင်းပါက အခန်းအရေအတွက် ၁၂၀၀ ကျော်ရှိပြီး လာရောက်လျှောက်ထားသူ တစ်သောင်းကျော်အထိ ရှိခဲ့သဖြင့် မဲဖောက်သည့်စနစ်ကိုကျင့်သုံးနေရခြင်းဖြစ်သည်။
မေလ ၁၄ ရက်နှင့် ၁၅ ရက် တွင် ဗိုလ်ဗထူး အိမ်ရာအတွက် မဲဖောက်ခြင်း အခမ်းအနားကို ရန်ကုန်မြို့ ဒဂုံမြို့နယ်ရှင်စောပု ဘုရားလမ်းရှိ Myanmar Events Park တွင် နံနက် ၈ နာရီမှ စတင် မဲဖောက်မည်ဖြစ်သည်။
အခန်းတစ်ခန်းလျှင် စတု ရန်းပေ ၉၀၀ ကျယ်ဝန်းသည့် ယင်းအိမ်ရာစီမံကိန်းတွင် အဆောက် အအုံပေါင်း ၄၄၈ ခန်းကို မဲ ဖောက်ပေးမည် ဖြစ်သည်။
တိုက်ခန်းမဲပေါက်သူများစာရင်းကို ရန်ကုန်မြို့တော်စည်ပင်သာယာရေးကော်မတီ အဆောက်အအုံနှင့် အင်ဂျင်နီယာဌာနတွင် ကြည့်ရှုနိုင်ပြီး ရောင်းချမှုအပိုင်းနှင့် အရစ်ကျငွေပေးချေမှုအပိုင်းကို အထက်ပါ ကော်မတီကပင် ဆက်လက်ဆောင်ရွက်သွားမည် ဖြစ်သည်။ ယခု အိမ်ရာစီမံကိန်းမှာ တိုင်းဒေသကြီး အစိုးရအဖွဲ့မှ ဒုတိယအကြိမ် မဲဖောက်ပေးခြင်း ဖြစ်ပြီး ဗိုလ်မင်းရောင် အိမ်ရာ စီမံကိန်းမှ အခန်းများကို ဧပြီလ ပထမပတ်က စတင်မဲဖောက်ပေး ခဲ့ပြီး ဖြစ်သည်။
၂၀၁၃-၁၄ ဘဏ္ဍာနှစ်တွင် ရန်ကုန်မြို့၌ အစိုးရက အိမ်ရာ စီမံကိန်း ၁၁ ခုကို စတင်အကောင် အထည်ဖော်ရန် ရည်ရွယ်ထားပြီး ရန်ကုန်၏ လိုအပ်နေသော အခန်းအရေအတွက်ကို ဖြည့်ဆည်းရန် ဆောင်ရွက်လျက်ရှိသည်။
ရန်ကုန်တွင် နှစ်စဉ်အခန်း ပေါင်း ၃၀,၀၀၀ ကျော်လိုအပ်နေ ပြီး နှစ်စဉ် ၇,၀၀၀ ကျော်သာ ဖြည့် ဆည်းပေးနိုင်ကြောင်း မြို့ပြပညာ ရှင်များက ခန့်မှန်းတွက်ချက်ထားသည်။
မြ၀တီ


 

 

Follow us on facebook